SENTITI GENTI!!!

Eccu lu Bandu te

BORGOINFESTA!

La festa ca face cojere tutti li cristiani ‘menzu la chiazza:

li piccicchi, le fimmine e l’ommini fatti!

Rivau lu sonu e lu cantu ca tantu ne piace,

lu ballu speciale ca ne mantene tisi,

mangiare e bìvere

pe’ cumplimentu,

azzàre la facce

a stu Salentu,

cu scappa te lu dulore e

te lu turmentu!

Vènenu moi te paesi diversi

te lu vicinu e te lu luntanu,

de la Calabria, de lu Garganu,

de la Campania, te lu Cilentu,

te sutta alle marine,

de l’Occitania, te la Sicilia,

de n’autra terra e puru te l’Africa.

Poeti, Musicisti, fini dicitori,

giocolieri, acrobati, attori,

musici e cantori…

Simu ‘rrivati

a Borgagne

mo chianu chianu

settàmune nu picca

ca difriscàmu…

pensamu meju e mangiamu bonu,

‘ssaggiamu lu vinu,

cantamu alla stisa e sonamu nu pocu,

lu ballu nosciu è lu ‘cchiu anticu…

quante cose voju ve dicu !

Ve dicu sulu difenditi sta terra,

ca puru l’acqua ca stae a ‘nterra

mo se la portanu luntanu …

Moi vindune tuttu,

comu se la vita ete na  fera!

Mo tocca spiccia sta chimera!

Le cose bone ‘nci le dae la terra

l’uva, le ulie e li simenti…

facimu festa

Belle Genti!

(Salvatore Gervasi)